Deri tani, ishin të obliguar që çdo gjashtë muaj të paraqiten për të dëshmuar se janë gjallë.
Por nga kjo e mërkurë, pensionistëve nuk u duhet ta bëjnë më një gjë të tillë.
Kjo pas një vendimi të Gjykatës Supreme, e cila e ka shpallur të paligjshëm udhëzimin administrativ që përcaktonte këtë rregull.
Sipas vendimit, Ministria përkatëse është tani e obliguar që vetë të monitorojë nëse pensionisti është gjallë.
“Në rast se pensionisti nuk paraqitet për verifikim, Ministria obligohet të shfrytëzojë burimet ekzistuese të informatave për të identifikuar pensionistët që kanë ndërruar jetë. Pra, përgjegjësia primare për verifikimin e statusit të jetës së pensionistit i takon organit publik, e jo qytetarit”,thuhet në njoftim e Gjykatës Supreme.
E ky lajm i gëzoi të moshuarit.
“…unë këtë vendim e përshëndes shumë. Faleminderit prej tyre. Prej sotit kam me fjetë si kingj”, ka thënë Tullari.
“E çka na, pleqve, me u maltretu çdo gjashtë muaj? Lehtëson punë për pleq të lodhtë. Qysh se lehtësohen sendet e mira, janë të mira. Inshallah veç punojnë”, ka thënë Kajtazi.
Këtë vendim po e sheh lehtësues edhe pensionisti Sabit Kamberi.
“Shumë mirë, hallall ju qoftë. Neve na lehtëson, atyre ju lehtëson kur të vdesim – më nuk lajmërohemi. Ditën e mirë”, u shpreh Kamberi.
Rreth dy muaj më parë, në Gjykatën Supreme ishte dorëzuar një padi e cila kishte për qëllim shfuqizimin e Udhëzimit Administrativ për procedurat e lajmërimit, suspendimin nga pagesa dhe kthimin e mjeteve në rastet e keqpërdorimit të pensioneve.
