Gati dy milionë pelegrinë myslimanë filluan udhëtimin shpirtëror të pelegrinazhit të Haxhit në Arabinë Saudite të mërkurën.
Pelegrinët rrethuan Qaben në zemër të qytetit të shenjtë të Mekës dhe filluan të lëviznin drejt Minës, një qytet i madh me tenda në rrugën për në Mekë, duke shënuar hapin e parë të ritualeve të Haxhit.
Pelegrinët do ta kalojnë natën në Mina duke u lutur dhe duke u përgjëruar, në përgatitje për ngjitjen në malin Arafat, kulmin e Haxhit, të enjten.
Kanali saudit Al-Ekhbariya tha se pelegrinët do të arrijnë në Mina me autobusë dhe trena “sipas planeve të organizuara të transportit” dhe “me një angazhim të qartë”, shkruan Anadoly.
Sipas shifrave zyrtare të publikuara nga autoritetet saudite, më shumë se 1.47 milion myslimanë kanë mbërritur në Arabinë Saudite për pelegrinazhin e Haxhit. Numri i përgjithshëm pritet të rritet me pelegrinët vendas që do të arrijnë në dy milion.
Vitin e kaluar, mbi 1.8 milionë pelegrinë myslimanë nga 200 vende të botës kryen ritualin.
Pelegrinazhi i Haxhit është shtylla e pestë e besimit islam – një ritual që duhet të kryhet nga të gjithë myslimanët, nëse kanë mundësi financiare, të paktën një herë në jetën e tyre.
Rituali përfshin disa rituale që synojnë të simbolizojnë konceptet thelbësore të besimit islam dhe të përkujtojnë sprovat e Profetit Ibraham dhe familjes së tij.
