Klubi i basketbollit Peja ka filluar me përforcime për pjesën e mbetur të sezonit.
Të enjten, kampi verdhezi, përmes një postimi në rrjete sociale, ka zyrtarizuar përforcimin e ri, i cili mbulon pozitën e qendrës.
Verdhezinjët kanë nënshkruar me Logan Routt, lojtar i gjatë 211 centimetra dhe që pritet të sjellë fuqi nën kosh për Pejën.
30 – Vjeçari, pritet ti bashkohet shqiponjave menjëherë në ndeshjen e rradhës që ata e luajnë në elitën e basketbollit kosovar.
Së fundmi, Routt ishte pjesë e Ligës së Parë turke, ku te skuadra Final Spor luajti me mesatare prej 12.5 pikëve dhe 7 kërcimeve për ndeshje.
Routt, përveç eksperiencave në Evropë, si në Slloveni, Turqi dhe Çeki, ka zhvilluar karrierë edhe në Amerikë dhe Japoni.
Përveç amerikanit Routt, te Peja pritet të ketë edhe disa transferime të tjera të huaja gjatë kësaj jave.
Skuadra nga Karragaqi, pas ciklit të parë të ndeshjeve, ishte thuajse perfekte në Superligë me bilanc 6-1, teksa tash është në bilanc 8-9, që tregon mjaft për gjendjen e skuadrës.
Aktualisht, Peja ndodhet në vendin e katërt në tabelë, teksa të shtunën në shtëpi e pret skuadrën e Rahovecit 029.
