Klubi i basketbollit Peja sonte zhvillon ndeshjen e radhës në Ligën Evropiane Veriore, ENBL.
Skuadra verdhezi veçse ka udhëtuar drejt Polonisë, ku do të përballet me kundërshtarët e Dziki Warszawa.
Ky duel i takon xhiros së katërt të Ligës ENBL dhe fillon nga ora 19:00.
Skuadra e Pejës nuk ka rezultate të mira në këtë kompeticion, që është edhe edicioni debutues për ta.
Pas tre xhirove në ENBL, skuadra verdhezi ka dy humbje dhe një fitore, duke zënë vendin e 21-të në renditjen tabelare.
Kundërshtarët e Pejës, Dziki Warszawa, kanë rezultate më të mira, me dy fitore karshi një disfate, dhe zënë vendin e 14-të në tabelë.
Peja drejt kryeqytetit polak ka udhëtuar e kompletuar, ku trajneri Greg Gibson do t’i ketë të gjithë lojtarët në dispozicion.
Këtë takim mund ta shikoni drejtpërdrejt në kanalin zyrtar të ligës ENBL në YouTube.
Përveç Pejës, këtë edicion në ENBL nga Kosova paraqitet edhe skuadra e Prishtinës, e cila të mërkurën zhvillon ndeshje në Angli, saktësisht ndaj Manchesterit.
