Kampionia e Kosovës në basketboll, Peja është eliminuar nga Liga e Kampionëve. Peja, ka pësuar humbje të thellë në ndeshjen çerekfinale të raundit kualifikues të kësaj gare, pasi është mposhtur nga skuadra e Danimarkës, Bakken Bears që ka avancuar në gjysmëfinale të raundit kualifikues.
Dueli i luajtur në “Gloria Sports Arena” në Belek të Turqisë, ka përfunduar me rezultatin 103:79 në të mirë të ekipit vendas. Skuadra daneze ishte dukshëm më e mirë se Peja dhe ka dominuar gjatë tërë takimit, të zhvilluar të hënën. Çereku i parë, përfundoi me shifrat 23:16 në të mirë të ekipit danez, i cili shkëputjen e madhe në rezultat e bëri në çerekun e dytë. Këtë periudhë, danezët e fituan me rezultatin 25:9.
Dy çerekët e fundit, Peja ishte më efikase në shënimin e pikëve sesa në dy periudhat e para, por kjo nuk mjaftoi për të shkrirë epërsinë e Bakken Bears prej 20 pikëve. Çerekun e tretë, Peja e fitoi me një pikë – 30:29 – por ta humbur të katërtin dhe konfirmuar fitoren e danezëve dhe avancimin tutje.
Jacob Calloway ishte më i dalluari te Peja, pasi ndeshjen e përfundoi me 14 pikë, 8 kërcime e 5 asistime. Me lojë të mirë, u veçua edhe Tervell Beck që pati 19 pikë, por që nuk mjaftuan për ta evituar eliminimin nga Championsi. Te skuadra daneze, Malik Parsons realizoi 22 pikë. Pas eliminimit nga Championsi, Peja pritet që garat evropiane t’i vazhdojë në fazën e grupeve të FIBA Europe Cup. Derisa kampioni aktual i Kosovës gjendet në grupin H të FIBA Europe Cup me kundërshtarët: Heroes Den Bosch nga Holanda, Niners Chemnitz nga Gjermania dhe Spojnia Stargard nga Polonia.
Sezoni i rregullt i garave në FIBA Europe Cup, nis me 18 tetor. Derisa pjesë e këtij kompeticioni është edhe nënkampionia e Kosovës, Trepça. Ndërsa Bakken Bears luan në gjysmëfinale të turneut me fituesin e ndeshjes Kalev/Cramo – Norrkoping.
