Skuadra e basketbollit Peja do të bëjë debutimin e saj në një arenë ndërkombëtare këtë sezon, duke u përballur sonte me ekipin estonez Rigas Zelli, në kuadër të Ligës Evropiane të Balltikut, ENBL.
Ky është një moment historik për verdhezinjtë, të cilët synojnë të tregojnë veten në një garë të nivelit të lartë, përballë disa prej skuadrave më cilësore të rajonit dhe më gjerë.
Ndeshja do të zhvillohet nga ora 19:00 në Pallatin e Rinisë dhe Sporteve në Prishtinë, që do të jetë edhe shtëpia e skuadrës Pejës për këtë ndeshje.
Rivali i parë në këtë rrugëtim është Rigas Zelli, një skuadër nga Estonia që tashmë ka dhënë sinjale të qarta të formës së mirë.
Në xhiron e parë të garës, ata arritën të mposhtin si mysafir skuadrën e njohur polake Dziki Warszawa, duke dëshmuar se janë një kundërshtar serioz për çdo ekip në ENBL.
Përballja e sotme pritet të jetë një test i rëndësishëm për trajnerin dhe lojtarët e Pejës, të cilët kanë bërë përgatitje intensive për të qenë gati për këtë sfidë ndërkombëtare.
Fitorja në këtë ndeshje do të ishte një nisje perfekte, si në aspektin sportiv ashtu edhe motivues për pjesën tjetër të garës.
Me përvojën e saj në basketbollin vendor dhe përforcimet që ka bërë në skuadër, Peja synon të paraqitet denjësisht dhe të shkruajë një kapitull të ri në historinë e saj sportive.
Kujtojmë se pos Pejës, në ENBL, këtë edicion paraqitet edhe skuadra e Prishtinës, ku pas dy ndeshjeve të luajtura, ka po aq fitore.
Këtë ndeshje, mund ta shikoni drejtëpërdrejtë në kanalin zyrtar të faqes “ENBL” në Youtube.
