Ministri i Bujqësisë, Pylltarisë dhe Zhvillimit Rural, Faton Peci ka thënë se inspektimi i Ligjit të Duhanit përkundër numrit të vogël të inspektorëve është duke ecur në drejtimin e duhur.
Ai tha se deri më tani janë shqiptuar 230 gjoba, të cilat sillen nga 200-1000 euro.
“Inspektimi i Ligjit të Duhanit përkundër numrit të vogël të inspektorëve është duke ecur në drejtimin e duhur. Shumë lokale gastronomike i kanë pranuar me entuziazëm aksionet e fundit të ndërmarra nga inspektorët dhe shumë nga ta janë duke i zbatuar rregullat që janë të vendosura.
Deri më tani janë shqiptuar 230 gjoba në nivel vendi dhe gjobat sillen në fazën fillestare nga 200 euro, ndërsa aktualisht shumica shqiptohen 1000 euro, pasi synimi është senzibilizues dhe jo dëmtimi i veprimtarisë së gastronomeve”, ka thënë ai.
Ai tha se deri më tani janë realizuar mbi 1500 inspektime në të gjithë territorin e Kosovës.
“Ajo që mund të tregojë se për të pasur një monitorim më të rreptë kemi implementuar një plan të ri operacional, ku me sistem rrotacion do të mundësojmë që inspektorët që janë të vendosur të kenë target tërë vendin, për të pasur një objektivitet sa më të madhe”, ka thënë ai.
