Ministri i Bujqësisë, Faton Peci, këtë e bëri të ditur në emisionin “Këndi i Debatit” në Tëvë1.
Sipas tij, projekti i Bankës Botërore, ka një njësi që e udhëheq dhe i bën të gjitha procedurat e duhura, prandaj është e shkëputur nga ministria.
“Punësimi i motrës së Xhelal Sveçlës në një projekt të Bankës Botërore që ka partneritet me Ministrinë e Bujqësisë, nuk ka lidhje me mua si ministër e as si kabinet politik. Për shkak se projekti për të cilin ne po flasim ka një njësi që e udhëheq dhe i bën të gjitha procedurat, edhe administrative, financiare, ekzekutimet edhe rekrutimet, do të thotë është e shkëputur nga ministria”, tha Peci.
Peci gjithashtu tha se Banka Botërore është ajo që ka bërë përzgjedhjen e stafit, pa pasur ndonjë përgjegjësi direkte Ministria e Bujqësisë në procesin e rekrutimit.
Ai bëri të ditur se informacionin për punësimin e motrës së Sveçlës e mori përmes medieve.
“Pra, stafi është i përzgjedhur nga projekti i Bankës Botërore, dhe ajo si njësi e ka vetëm pjesën e ndarjes së informacioneve për projekte të ndryshme. Por ne si ministri në pjesën e organizimit nuk kemi përgjegjësi direkte as në proces të rekrutimit, as në vendosjen e prioriteteve e as në menaxhim. Ne informacionin për punësimin e motrës Sfeçla e kemi marrë nga mediat, kur unë kam qenë në një studio televizive e kam marrë një informacion të tillë”, shtoi tutje ai.
