Kryetari i partisë “Guxo”, Faton Peci ka deklaruar se kryeministri në detyrë, Albin Kurti në takimin me kryetarin e Nismës Socialdemokrate ka pasur “qasje gjeneroze” në ofrimin e mundësisë për bashkëqeverisje.
Sipas tij, fryma e takimit ka qenë pozitive dhe korrekte, për çka u shpreh optimist se ditëve në vijim mund të ketë dakordim.
“Mendoj që optimizmi si natyrë duhet të na shoqërojë gjithsecilin prej nesh dhe asnjëherë nuk duhet me u ndalë së kërkuari ofrimin edhe gjetjen e një zgjidhje. Por sidoqoftë ne gjithë e dimë që për të arritur një rezultat duhet çdo herë që të dakordohen dy palët. Ajo që dihet është që kryeministri në pjesën e bashkëbisedimit me zotëri Limajn ka pasur një qasje bukur gjeneroze në ofrimin e mundësisë për bashkëqeverisje me Nismën Socialdemokrate, për shkak se bashkëngjitja e Nismës ne mendojmë që do t’i ofrojë Kosovës edhe konstituimin e kuvendit edhe themelimin e qeverisë. Kështu që në funksion të kësaj, për modalitete të tjera më konkrete i takon kryeministrit Kurti dhe zotëri Limajt të cilët kanë qenë akterët kyç dhe që kanë marrë pjesë në procesin e negociatave ose bisedimeve”, ka thënë ai para mediave pas dështimit të pesëdhjetë të konstituimit të Kuvendit.
Në konferencë për media pas dështimit të konstituimit të legjislaturës së nëntë, Peci tha se takimi i Kurtit me Limajn ka qenë në frymë pozitive dhe korrekte.
“Fryma e takimit ka qenë në frymë pozitive edhe korrekte, në funksion të kësaj mbesim me shpresë që mund të ketë një dakordim ose reflektim deri në ditët në vijim. Në rast të pamundësisë unë mendoj se shoqëria kosovare gjithë ata që tregohet më gjeneroz, të gjithë ata që tregojnë vullnetin më të madh për të dhënë kontributin pavarësisht peshës politike që e kanë, zakonisht i shpërblen me mirënjohje dhe votë. Në funksion të kësaj unë vlerësoj se sa më të vogla janë partitë politike që shprehin gatishmëri për të dhënë kontributin dhe pjesëmarrjen në institucione, zakonisht është reflektimi dhe shpërblimi qytetar që ka ardhur përmes votës”, është shprehur Peci.
