Kandidati për kryetar të Mitrovicës nga radhët e VV-së, Guxo-s dhe Alternativës, Faton Peci, ka dhënë zotime konkrete për qytetarët, duke thënë se ndryshimet do të ndihen qysh në gjashtë muajt e parë të qeverisjes së tij.
Peci tha se synon ta përmirësojë jetesën e qytetarëve të Mitrovicës, njëjtë si të fermerit që e realizoi gjatë mandatit të tij si ministër i Bujqësisë.
“Unë jam zotim publik le të më bëjnë qytetarët e Mitrovicës për fjalë. Sot, e dimë se si është Mitrovica, dhe gjashtë muaj e parë të angazhimit tim si kryetar të Mitrovicës ata kanë me prek nivelin e ndryshimit. Unë synoj, ashtu siç ia kam ndryshuar jetën pozitivisht fermerit të Kosovës… të njëjtin për secilin sektor veç e veç synoj që ta realizoj në Komunën e Mitrovicës”, deklaroi Peci në emisionin “Mesditë” në Tëvë1.
Ai tha se një nga prioritetet e para do të jetë menaxhimi i mbeturinave dhe krijimi i hapësirave publike të gjelbra.
Sipas tij, gjatë vitit të parë qytetarët do të shohin ndryshime të prekshme.
“Prej zotimeve të para është menaxhimi i mbeturinave dhe hapësirave publike të gjelbra. Viti i parë do të jetë ndryshimi, do të vërehet. Gjatë gjithë mandatit ne synojmë që të investojmë në ndërtimin e kapaciteteve të reja, blerjen e mekanizimit të ri, plan të ri menaxhimi… posaçërisht do të ketë një plan operacional gjatë muajve korrik e gusht”, tha ai.
