PDK-ja ka vendosur disa nga shkrimet para objektit të Qeverisë si: “Skandalet e Donika Gërvalla Schwarz”, “Buka 99 centë”, “Nafta 1,58 euro”, “E harrut Astrit Deharin”, “165 milionë euro ZRrE-së terr qytetarëve”, “Emërimi i xhaxhait të Glauk Konjufcës”, “Asnjë fjalë për çlirimtarët”.
Anëtari i kryesisë së PDK-së, Donjet Bislimi në konferencën për media, qeverisjen 12 mujorshe të Kurtit e ka quajtur vit të praktikantëve që nuk shënuan asnjë progres, raporton Teve1.info.
“Dje më 22 mars qeveria Kurti dy i ka bë një vit, por fatkeqësisht ky është një vit i praktikantëve që nuk shënuan asnjë progres. Gjatë këtyre 365 ditëve kemi parë gjithçka por vetëm qeverisje jo. Qytetarët për një vit rresht kanë parë paaftësitë e Albin Kurtit për të qeverisur. Gjatë kësaj periudhe qeveria “Kurti” me paaftësinë e saj ka krijuar një listë të gjatë dështimesh dhe keqmenaxhimeve duke shpërfaqur një paaftësi të madhe në qeverisje e cila vjen ekskluzivisht nga mungesa e kompetencës vizionit e vullnetit”, ka thënë Bislimi.
Sipas tij, për një vit qytetarët janë varfëruar më së shumti që nga paslufta.
“Shporta ushqimore e qytetarit është shtrenjtuar aq shumë sa qytetarët mezi po ia dalin ta mbyllin muajin”, tha ai.
Po ashtu, Bislimi tha se qeveria “Kurti” ka arritur që për një vit të krijojë vende pune vetëm për familjarët.
“Kjo qeveri për një vit ka arritur të krijojë disa qindra vende pune vetëm për nipat, dajt dhe familjarët e ministrave dhe deputetëve të Kosovës”, deklaroi më tej ai. /teve1.info/
