Partia Demokratike e Kosovës ka reaguar për deklarimet e ministres së Drejtësisë, Albulena Haxhiu, se nuk do ta pranoj vendimin e Gjykatës Kushtetuese sa i përket Ligjit për Këshillin Prokurorial të Kosovës, raporton teve1.info
Përmes një postimi në Facebook, koordinator i Departamentit për Drejtësi në kuadër të Kabinetit për Qeverisje të Mirë, Përparim Gruda, ka thënë se sulmet që ministrja e Drejtësisë i bëri sot Gjykatës Kushtetuese, tregojnë se kjo Qeveri nuk respekton asnjë parim, asnjë institucion e aq më pak Kushtetutën e Kosovës.
“Në një vend demokratik nuk mund të ndodh kurrë që një Ministre e Drejtësisë të sulmoj kështu Gjykatën Kushtetuese për vendimmarrjen e saj.
Kjo qeveria është e paftë, pa program dhe pa vullnet për të bërë gjëra të mira për vendin. Prandaj, sulmet ndaj çdo institucioni ose individi që nuk mendon si ata, janë përpjekje për të mbuluar mospunën dhe paaftësinë e tyre”, ka shkruar ai.
Paraprakisht, ministrja Haxhiu mbajti konferencë për medie, ku e kritikoi vendimin e Gjykatës Kushtetuese të nxjerrë një ditë më parë, për Ligjin për Këshillin Prokurorial të Kosovës.
