Një nga një, erdhën në zyrat e partisë.
Një ditë pas vendimit dënues ndaj ish krerëve të Ushtrisë Clirimtare të Kosovës, PDK e mblodhi kryesinë.
E përveç tyre, erdhën edhe grupi parlamentar.
Brenda mbi dy orë diskutuan për hapat tutje pas këtij vendimi, që preku edhe dy prej ish-drejtuesve kryesorë të tyre, Hashim Thaçin dhe Kadri Veselin.
Temë diskutimi ishte edhe iniciativa që në publik u konsiderua si zhbërje e Gjykatës Speciale.
“Po qe se vjen e mund të vjen iniciativa ligjore në Kuvendin e Kosovës normalisht që kemi nevojë për mbështetjen e subjekteve të tjera politike. PDK-ja i ka nënshkrimet e gatshme, varësisht prej nevojave ne do të procedojmë. Nuk po flasim për zhbërjen e Gjykatës Speciale, po flasim për përshtatje me një situatë të re. Nuk po i ikim obligimit që e kemi marrë që Gjykata t’i hetojë, t’i prezantojë e faktojë të gjitha gjetjet e raportit të Dick Martyt për çka edhe është krijuar Gjykata”, ka thënë Hamza.
Për këtë çështje, Hamza tha se do të takoj edhe liderët e partive të tjera.
“Kjo nuk është më çështje që i takon një subjekti politik. Ata nuk janë shkuar atje si anëtarë të ndonjë subjekti politik por si ish-eprorë të Ushtrisë Çlirimtare të Kosovës. Besoj në bashkëpunimin me subjektet e tjera politike, në krijimin e një konsensusi të nevojshëm dhe ne si PDK do të dalim me veprime konkrete duke i përfshirë edhe ato ligjore edhe demokratike”, u shpreh Hamza.
Partia që ka dërguar në Gjykatën Kushtetuese konstituimin e Kuvendit, thanë se janë të gatshëm të kthehen në parlament, për shkak të situatës së krijuar.
“Kur ndryshojnë rrethanat, duhet me ndërru edhe qëndrimi jonë. Ndërrojnë edhe prioritetet. Prioritet më të madh për këtë situatë nuk ka që ne si shtet të veprojmë në përputhje me interesat e shtetit. Jo vetëm atë, atyre personaliteteve, ish-eprorëve të UÇK-së, por mbi të gjitha edhe për interesa e shtetit. Prandaj, në bazë të rëndësisë, rrethanave, do sillemi në atë mënyrë… Nëse ka nevojë, ne do të jemi në Kuvend. Që ka nevojë, kjo është prioritet mbi atë”, ka deklaruar tutje Hamza.
PDK kishte vendosur që të mos merrte më pjesë në seanca të Kuvendit, pasi Lëvizja Vetëvendosje nuk ua votoi si nënkryetare të Kuvendit Vlora Çitakun.
Megjithatë, edhe qëndrimi i Vetëvendosjes tashmë ka ndryshuar, duke u zotuar se do ta votojnë edhe Çitakun për nënkryetare.
