Partia Demokratike e Kosovës (PDK) nuk e ka mbështetur propozimin për Buxhetin e Kosovës për vitin 2026.
Këtë e bëri të ditur shefi i Grupit Parlamentar të PDK-së, Arian Tahiri, i cili theksoi se projektligji për buxhetin përmban mbi 700 faqe dhe kërkon kohë shtesë për shqyrtim.
Sipas tij, PDK-ja ka shprehur gatishmëri që të mos bllokohet funksionimi i shtetit, duke përkrahur vazhdimin e financimit për muajin mars. Megjithatë, ai nënvizoi se për miratimin e buxhetit nevojitet një proces i rregullt dhe kohë e mjaftueshme për analizë.
Kritika ndaj projektbuxhetit ka pasur edhe nga LDK-ja dhe AAK-ja.
Kryetari Lumir Abdixhiku, ka reaguar ndaj mënyrës se si është proceduar Projektbuxheti për vitin 2026.
Ai e cilësoi të papranueshme kohën e shkurtër që u është dhënë deputetëve për analizimin e dokumentit, duke theksuar se një buxhet shtetëror nuk mund të trajtohet brenda pak orësh. Sipas tij, përmbajtja e projektit lë shumë paqartësi dhe nuk përputhet as me strukturën aktuale të qeverisë, pasi disa ministri, siç tha ai, nuk figurojnë me ndarje të qarta buxhetore.
Abdixhiku tha se dokumenti financiar nuk përfshin as premtimet e fundit të ekzekutivit dhe nuk reflekton prioritetet e shpallura publikisht.
Edhe Aleanca për Ardhmërinë e Kosovës (AAK) u shpreh kundër draftit. Shefi i grupit parlamentar, Besnik Tahiri, deklaroi se projektbuxheti i vitit 2026 nuk sjell ndryshime thelbësore krahasuar me vitin paraprak. Sipas tij, struktura dhe vijat buxhetore mbeten pothuajse të njëjta, duke lënë të kuptohet se dokumenti nuk ofron risi apo orientim të ri zhvillimor.
Partitë opozitare patën kërkesë që kryeministri Kurti të jetë i pranishëm në sallë përderisa diskutohet projektligji.
“Padyshim, është e rëndësishme të jetë zoti i shpisë këtu, kryeministri i Kosovës. Le të vjen, ta diskutojmë. Merreni me seriozitet. Nëse s’kemi mirëkuptim, LDK nuk do të votojë për në këtë drejtim”, u shpreh Abdixhiku. /teve1.info/
