Partia Demokratike e Kosovës (PDK) ka reaguar pas dështimit të seancës së sotme për konstituimin e Kuvendit të Republikës së Kosovës, duke shprehur shqetësim për vazhdimin e bllokadës institucionale.
Në një deklaratë për media, PDK vlerësoi se moskonstituimi i Kuvendit është në kundërshtim me aktgjykimin e Gjykatës Kushtetuese, i cili, sipas saj, kërkon që Kuvendi të konstituohet brenda afatit 30-ditor nga certifikimi i rezultateve të zgjedhjeve.
PDK pretendon se dështimi i seancës nuk është pasojë e mungesës së votave, por rezultat i një vendimi politik të Lëvizjes Vetëvendosje dhe kryeministrit në detyrë, Albin Kurti. Sipas partisë, në seancën e sotme nuk u propozua kandidati për kryetar të Kuvendit, duke pamundësuar vazhdimin e procesit të konstituimit.
Në reagim thuhet gjithashtu se mosveprimi përbën shpërfillje të rendit kushtetues dhe të detyrimeve që burojnë nga vendimi i Gjykatës Kushtetuese.
PDK i bëri thirrje Lëvizjes Vetëvendosje dhe Albin Kurtit që të respektojnë aktgjykimin e Gjykatës Kushtetuese, të heqin dorë nga, sipas saj, bllokada institucionale dhe të mundësojnë konstituimin e Kuvendit.
