Partia Demokratike e Kosovës (PDK) ka shprehur shqetësimin e saj pas dështimit të seancës së sotme për konstituimin e Kuvendit të Republikës së Kosovës.
Sipas PDK-së, moskonstituimi i Kuvendit përbën vazhdim të bllokadës institucionale nga ana e kryeministrit në detyrë, Albin Kurti, në kundërshtim, siç thotë kjo parti, me detyrimet e përcaktuara nga aktgjykimi i Gjykatës Kushtetuese.
“Seanca e sotme dëshmoi qartë se zvarritja e krijimit të institucioneve nuk është pasojë e rrethanave apo e mungesës së votave, por rezultat i një zgjedhjeje politike të Lëvizjes Vetëvendosje dhe Albin Kurtit”, thuhet në reagimin e PDK-së.
Sipas kësaj partie, nuk kishte arsye që të mos propozohej kandidati për kryetar të Kuvendit dhe të vazhdohej me procesin e votimit për konstituimin e tij.
“Gjykata Kushtetuese ka qenë e qartë në aktgjykimin e saj se Kuvendi jo vetëm duhet të mblidhet, por duhet të konstituohet brenda afatit 30-ditor nga certifikimi i rezultateve të zgjedhjeve”, theksohet në reagim.
PDK ka deklaruar se mosveprimi i sotëm përbën, sipas saj, shpërfillje të rendit kushtetues dhe të detyrimeve që burojnë nga vendimi i Gjykatës Kushtetuese.
“Askush nuk është mbi Kushtetutën dhe askush nuk ka të drejtë të mbajë peng institucionet e Republikës për interesa partiake”, thuhet në reagim.
Partia Demokratike e Kosovës ka ritheksuar se vendi ka nevojë për institucione funksionale, stabilitet politik dhe respektim të plotë të Kushtetutës.
Në fund, PDK i ka bërë thirrje Lëvizjes Vetëvendosje dhe Albin Kurtit që të respektojnë aktgjykimin e Gjykatës Kushtetuese, të heqin dorë nga, siç e ka cilësuar ajo, bllokada institucionale dhe të mundësojnë konstituimin e Kuvendit të Republikës së Kosovës./teve1.info/
