Partia Demokratike e Kosovës ka paraqitur një mocion për gjendjen në Ministrinë e Tregtisë, Industrisë dhe Ndërmarrësisë.
Paraqitësi i këtij mocioni, Ferat Shala ka thënë se ministria po shënon dështime e skandale të vazhdueshme.
Shala ka thënë fillimisht se një projekt 15 milion eurosh i Bankës Botërore është keqmenaxhuar.
“Projekti i Bankës Botërore CERP në vlerë 15 milionë euro, i keqmenaxhuar juridikisht dhe operacionalisht, duke trajtuar disa biznese e duke anashkaluar shumë të tjera meritorë, duke ridestinuar dhe keqmenaxhuar këtë projekt”, ka thënë Shala.
Ai ka shtuar se një skandal tjetër ka të bëjë me lënien e artefakteve origjinale të Kosovës në Dubai.
“Skandali i radhës është skandali i Dubait Expo 2020, ku tetë muaj artefaktet e Kosovës mbesin në Dubai ndërsa kabineti qeveritar kthehet dhe pas tetë muajsh na vinë pa e ditur si është gjendja e tyre. Pra një ministre që i lë artefaktet më kryesore shtetërore, historike, origjinale në Dubai”.
Sipas tij ministria ka shkarkuar deri më tash shtatë sekretarë pa arsye si dhe po i paguan ekspertët për hartimin e strategjisë së Industrisë 1000 euro në ditë.
“Emërimi dhe shkarkimi deri më tani i shtatë sekretarëve permanent. Një ministri që Brenda një gjysmë mandati shkarkon dhe emëron shtatë sekretarë permanent, do të duhej të reflektonim të gjithë ne për të ditur se çka po ndodhë, çka janë ata njerëz dhe kjo ministre që operon me njeriun në mënyrë të paligjshme dhe padinjitetshme. Angazhimi i ekspertëve me pagesë 1000 euro ditën, në Kosovën ekonomikisht çfarë e dimë të gjithë, kjo ministri angazhon ekspertë për hartimin e Strategjisë së Industrisë, 1000 euro ditën. Me pas qenë strategji për NATO-n, 1000 euro në ditë është kosto e lartë”, ka deklaruar Shala.
Shala ka folur edhe për një aferë tjetër të pretenduar, duke thënë se janë paguar paratë për 200 mijë litra vaj por vaji ende nuk ka ardhur në Kosovë.
“Sot e kemi edhe keqmenaxhimin e vajit ushqimor, rreth 200 mijë litra vaj të kontraktuara në kompaninë perëndimore të një shteti mik, nuk kanë ardhur. Pagesa është kryer ndërsa vaji nuk ka ardhur në Kosovë”, ka thënë ai, shkruan teve1.info.