Shefi i Grupit Parlamentar të kësaj partie, Abelard Tahiri ka kërkuar nga ZRrE, kryeministri Kurti e presidentja Osmani që ta respektojnë këtë vendim.
“Partia Demokratike e Kosovës përmes një ankese në Gjykatën Themelore të Prishtinës ka arritur që ta pezullojë vendimin e ZRRE-së për shtrenjtimin e energjisë elektrike në 100%. Kemi thënë dhe kemi punuar në vazhdimësi që ta kundërshtojmë këtë vendim të paligjshëm, këtë vendim i cili ka qenë në shpërputhje të plotë me bazën ligjore mbi të cilën është marrë”, tha ai.
“I bëjmë thirrje ZRRE-së, të gjithë akterëve që kanë qenë të angazhuar në shtrenjtimin e energjisë elektrike, zyrës së kryeministrit Kurti, zyres së presidentes dhe presidentes Vjosa Osmani, LLV-së ta respektojnë vendimin e gjykatës në pezullimin e implementimit të vendimit të ZRRE-së”, shtoi ai.
Ndërkaq, deputeti i PDK-së, Ferat Shala, njëherësh kryetar i Komisionit Parlamentar për Ekonomi, Tregti, Industri dhe Ndërmarrësi, tha se ky vendim i Gjykatës dëshmon se Qeveria ka marrë vendime shumë të dëmshme për qytetarët në kohën e krizës energjetike, andaj ai paralajmëroi se shumë shpejt do të themelohet Komisioni Hetimor Parlamentar ku do të zbardhen të gjitha keqpërdorimet e qeverisë me fondet publike në kohën e krizës energjetike.
