Partia Demokratike e Kosovës (PDK), këtë të shtunë ka përkujtuar Vëllezërit Bytyqi.
Kryetari i kësaj partie, Memli Krasniqi bashkë me Vlora Çitakun e disa bashkëpartiakë të tjerë kanë bërë homazhe tek varret e vëllezërve Bytyqi, ku u shprehen se ata janë shembulli ideal i atdhedashurisë.
“Në 24 vjetorin e ekzekutimit nga shteti serb, me paramendim dhe në gjakftohësi, kujtojmë tre heronjë, tre vëllezër, Mehmet, Agron dhe Yll Bytyqi. Vëllezërit Bytyqi janë shembulli ideal i atdhedashurisë. Me bekimin e prindërve të tyre, kur Kosova kishte më së shumti nevojë, ata lanë jetën e sigurt në SHBA dhe morën rrugën e lavdisë për çlirimin e vendit.
Si pjesë e Batalionit “Atlantiku” në radhët e UÇK-së, ata dhanë kontribut të çmuar për liri, të cilën patën fatin edhe ta përjetojnë. Populli i Kosovës do t’i jetë përjetësisht mirënjohës familjes Bytyqi për kontributin e tyre të jashtëzakonshëm në çlirimin e Kosovës. Ndërkaq, Kosova dhe institucionet tona nuk duhet të ndalen asnjëherë së kërkuari drejtësi, deri kur kriminelët serbë të marrin dënimin e merituar për vrasjen e vëllezërve Bytyqi!Lavdi e përjetshme!”, thuhet në njoftim.
