Partia Demokratike e Kosovës ka reaguar lidhur me situatën e krijuar në Kuvendin e Kosovës, duke kërkuar vazhdimin e menjëhershëm të procesit të konstituimit të Kuvendit.
Në një reagim publik, PDK ka bërë thirrje për rikthimin e rendit kushtetues dhe i është drejtuar kryesuesit të seancës konstituive, Avni Dehari, duke i kërkuar që të mundësojë vazhdimin e seancës.
“PDK është në Kuvend dhe kërkon me vendosmëri rikthimin e rendit kushtetues në vend. Reflektoni – HAPENI KUVENDIN!”, thuhet në reagimin e partisë.
PDK ka rikujtuar se roli i Deharit si kryesues i seancës konstituive, në cilësinë e deputetit më të vjetër, është i përcaktuar dhe i kufizuar nga Kushtetuta, aktgjykimet e Gjykatës Kushtetuese dhe Rregullorja e Kuvendit.
Sipas PDK-së, përgjegjësia e kryesuesit është të sigurojë zhvillimin dhe vazhdimin e seancës deri në konstituimin e plotë të Kuvendit.
“Nuk është në kompetencën tuaj që, mbi bazën e vlerësimeve apo konsideratave politike, të vendosni nëse dhe kur duhet të vazhdojë procesi i konstituimit të Kuvendit”, thuhet më tej në reagim.
Partia Demokratike e Kosovës ka kërkuar që procesi institucional të vazhdojë në përputhje me dispozitat kushtetuese dhe rregullat e Kuvendit./teve1.info/
