Zëdhënësi i PDK-së, Faton Abdullahu, kërkoi nga pushteti t’i mbaj duart larg nga hetimi i rastit Berishaj. Ai këto komente i bëri pas publikimit në medie se Agjencia Kundër Korrupsion në Kosovë ka ngritur kallëzim penal në Prokurori me dyshimin se Martin Berishaj ka fshehur të hyrat prej gjysmë milion eurove.
Zëdënësi Abdullahu tha se qasja e përfaqësuesve të institucioneve të Kosovës është qasje populiste.
“Kërkojmë që Ambasadori Berishaj të shkarkohet urgjentisht, pos tjerash edhe që të mundësohet hetimi i drejtë dhe i papenguar. Kemi të drejtë të dyshojmë se do të ketë iterferim të pushtetit populist në institucionet e pavarura siç është Prokuroria e Shtetit. Kërkojmë nga pushteti t’i mbajë duart larg nga hetimet sidomos tash kur e kemi parasysh zellin populist që është treguar në mbrojtjen e ambasadorit nga presidentja dhe nga kryeministri i vendit”, ka thënë Abdullahu.
Avdullahu kërkoi që hetimi ndaj Berishajt të bëhet i pavarur dhe i pa ndikuar nga pushteti.
“Konsiderojmë se kjo qasje e pushtetarëve sot është mentalitet populist i cili bënë paqe të kamufluar me korrupsionin e në anën tjetër trumbeton shurdhueshëm për luftën kundër korrupsionit”, tha Abdullahu.
Abdullahu kërkoi sqarime edhe nga Presidentja e vendit, Vjosda Osmani dhe Kryeministri Albin Kurti të deklarohen për mbrojtjen në publik që ia kanë bërë Berishajt me rastin e publikimit të skandalit për korrupsion në medie, muaj më parë.
