Kryetari i Partisë Demokratike të Kosovës, Memli Krasniqi, njoftoi se PDK do të dorëzojë sot një rast të ri në Gjykatën Kushtetuese lidhur me seancën konstituive të Kuvendit.
Krasniqi theksoi se kjo masë vjen pas tri shkeljeve të reja radhazi të Kushtetutës, në kundërshtim me aktgjykimin e fundit të Gjykatës Kushtetuese. Ai bëri apel që çështja të trajtohet me urgjencë, pasi kanë mbetur vetëm 23 ditë deri në përmbylljen e afatit ligjor për konstituimin e Kuvendit.
“Sot ju njoftoj se tashmë, pasi ka ndodhur tri shkelje të reja radhazi të Kushtetutës në kundërshtim me aktgjykimin e fundit, sot gjatë ditës, PDK do të dorëzojë pranë Gjykatës Kushtetuese një rast të ri për të cilin shpresojmë që Kushtetuesja do ta trajtojë me urgjencën e nevojshme meqenëse tashmë i kemi vetëm 23 ditë në përmbylljen e afatit për konstituimin e Kuvendit.23 ditë i kanë mbetur Albin Kurtit që të tërhiqet nga qëndrimi i tij imponues, nga pengmarrja e shtetit dhe që të ndryshojë propozimin e tij dhe të kthehet në normalitetin e rrjedhës së seancës siç ka kërkuar aktgjykimit.Tri vazhdimet e seancës kanë qenë shkelje e qëllimshme dhe me vetëdije e Kushtetutës nga ana e kryesuesit të seancës me instruksione të partisë së tij dhe ne s’mund të rrimë duarkryq,” tha Krasniqi.
Ai akuzoi kryesuesin e seancës për shkelje të qëllimshme dhe me vetëdije të Kushtetutës, duke vepruar sipas instruksioneve të partisë së tij, dhe tha se PDK nuk mund të qëndrojë duarkryq përballë këtyre veprimeve.
