Deputeti i PDK-së, Abelard Tahiri, ka njoftuar sot se kjo parti ka dorëzuar një kërkesë në Gjykatën Kushtetuese për anulimin e vendimit të Zyrës së Rregullatorit për Energji (ZRRE), i cili, sipas tij, ka nxjerrë në mënyrë të dhunshme rreth 1300 biznese në të ashtuquajturin “treg të lirë”.
Tahiri paralajmëroi se ky vendim rrezikon qindra mijëra vende pune dhe dëmton rëndë ekonominë e vendit.
“Sot në emër të PDK-së, në mbrojtje të interesit publik, në mbrojtje të qindra mijëra vendeve të punës, në mbrojtje të ekonomisë së vendit tonë, sapo dorëzuam kërkesë në Gjykatën Kushtetuese për anulimin e vendimit të ZRRE-së. Ky vendim në mënyrë të dhunshme nxori rreth 1300 biznese në të ashtuquajturin treg të lirë, sepse në Kosovë nuk ka treg të lirë,” tha ai.
Deputeti shtoi se vendimi dëmton edhe prodhuesit dhe ndërmarrësit që sipas tij, “mbajnë gjallë ekonominë e vendit”.
PDK ka kërkuar gjithashtu nga Kushtetuesja masë të përkohshme për pezullimin e menjëhershëm të këtij vendimi deri në shqyrtimin e plotë të çështjes.
“Ne sot kërkuam një masë të përkohshme fillimisht nga Gjykata Kushtetuese, në mënyrë që të pezullohet implementimi i këtij vendimi dhe pastaj të shqyrtohet,” theksoi Tahiri.
