PDK-ja ka thënë se këto demonstrata shënojnë një kthesë në historinë e popullit të Kosovës, që u ngrit kundër shtypjes dhe represionit të përjetuar nga pushtuesi jugosllav.
“‘Kosova kosovarëve’, ‘Duam Republikë’, ‘Republikë kushtetutë, ja me hatër ja me luftë’, ‘E duam flamurin kombëtar’, ‘Duam bashkimin e trojeve shqiptare’, ishin këto disa nga parullat e demonstratave të vitit 1981, të cilat shënojnë një kthesë në historinë e popullit të Kosovës, që u ngrit kundër shtypjes, shfrytëzimit, padrejtësisë dhe represionit të përjetuar nga pushtuesi jugosllav”, thuhet në njoftimin e kësaj partie.
Nga PDK-ja kanë shprehur mirënjohje dhe nderime për të gjithë pjesëmarrësit dhe organizatoret e këtyre demonstratave.
“Pikënisja e këtyre demonstratave ishte 11 marsi i para 41 viteve me shpërthimin e revoltës nga studentët e Universitetit të Prishtinës për kushte më të mira dhe trajtim dinjitoz. Mirënjohje dhe nderime të thella për të gjithë pjesëmarrësit dhe organizatorët e demonstratave të vitit 1981, të cilët frymëzuan idealet e pasardhësve për Kosovën e lirë”, thuhet më tej në njoftimin e PDK-së. /teve1.info/
