Partia Demokratike e Kosovës ka reaguar lidhur me procesin e rinumërimit të votave dhe mospërputhjet e evidentuara në disa komuna të vendit, duke theksuar se po e përcjell me vëmendje të shtuar gjithë procesin.
Në një komunikatë për media, PDK ka vlerësuar se çdo indikacion për cenim apo manipulim të votës është i papranueshëm dhe përbën shkelje serioze të parimeve demokratike.
“Vota e qytetarëve është e shenjtë dhe çdo trajtim jokorrekt ose përpjekje për manipulim shkel parimet demokratike që ne mbrojmë”, thuhet në reagimin e kësaj partie.
PDK ka theksuar se standardi i saj është i qartë dhe se çdo votë duhet të trajtohet me respekt dhe kujdes maksimal, që nga momenti i hedhjes së saj deri në certifikimin përfundimtar të rezultateve zgjedhore.
Sipas PDK-së, eliminimi i çdo dyshimi rreth procesit zgjedhor është në interes të kandidatëve, institucioneve dhe qytetarëve, ndërsa transparenca mbetet element kyç për besueshmërinë e zgjedhjeve.
Partia Demokratike e Kosovës ka bërë të ditur se pret konkluzionet zyrtare të organeve përgjegjëse, përfshirë Komisionin Qendror të Zgjedhjeve, duke shprehur besimin se vullneti i qytetarëve do të reflektohet saktë dhe në përputhje me ligjin. /teve1.info/
