Partia Demokratike e Kosovës i është drejtuar Panelit Zgjedhor për Ankesa dhe Parashtresa (PZAP) me kërkesë për t’i shpallur të pavlefshme votat nga mërgata që, sipas saj, kanë arritur pas afatit ligjor.
PDK pretendon se Komisioni Qendror i Zgjedhjeve ka shkelur ligjin duke pranuar mbi 20 mijë fletëvotime të mërgatës pas afatit ligjor të përcaktuar.
Sipas këtij subjekti politik, i cili doli i dyti në zgjedhjet e mbajtura më 28 dhjetor, këto fletëvotime kanë ndikuar që të humbë një ulëse në kuvend.
Përfaqësuesi i PDK-së në KQZ, Ilir Gashi, përmes një reagimi në Facebook, ka thënë se vendimi i KQZ-së për të pranuar këto vota u bë me vetëdije se po shkelet ligji, me arsyetimin për të mos u dukur “kundër mërgatës”.
“Si përfaqësues të PDK-së, e kemi fituar betejën në KQZ ndaj kolegëve të Lëvizjes Vetëvendosje, të cilët kishin bërë thirrje që të mos ndaheshin mjete financiare për dërgimin e fletëvotimeve origjinale për secilin votues në mërgatë. Ne e kemi realizuar këtë obligim ligjor, pavarësisht kundërshtimeve të anëtarëve të VV-së. Propozimi për pranimin e fletëvotimeve pas afatit u miratua në KQZ me vetëdije se po bëhej shkelje ligjore, edhe pse kjo u arsyetua me qëllimin që të mos keqkuptohej se jemi kundër mërgatës. Prandaj, organet kompetente duhet të vendosin në mënyrë meritore lidhur me vendimin e KQZ-së për pranimin e fletëvotimeve jashtë afatit ligjor”, ka shkruar ai.
Ndërkaq, përfaqësuesi i Lëvizjes Vetëvendosje në KQZ, Alban Krasniqi, e ka cilësuar ankesën e PDK-së si një dështim për të penguar votën e diasporës.
“PDK qenka ankuar kundër votave të mërgatës kur e panë që dështuan ta pengonin e ta pamundësonin votimin përmes postës. Vet e votuan në KQZ procedurën dhe afatet, e tash kur mërgata u vetorganizua dhe arriti të sjellë fletëvotimet nga gjithandej globit këtyre u djeg ky fakt duke harruar që humbjen nuk e kanë nga mërgata, e as nga votuesit në Kosovë, por nga sjellja, veprimet dhe vendimet e dëmshme të vet PDK-së që prej themelimit të saj e deri tek ky i sotit përmes kësaj ankese të turpshme kundër mërgatës”, ka shkruar Krasniqi.
Tashmë i mbetet Panelit Zgjedhor për Ankesa dhe Parashtresa që brenda afateve ligjore të shqyrtojë ankesën e PDK-së.
