Pavarësisht një vale të re sulmesh ajrore gjatë natës ndaj kryeqytetit ukrainas, Kremlini ka deklaruar se mbetet i interesuar për të ndjekur bisedimet e paqes me Ukrainën.
Deklarata vjen ndërsa tensionet në fushëbetejë mbeten të larta dhe Rusia vazhdon operacionin e saj ushtarak në Ukrainë.
Sipas agjencive ndërkombëtare të lajmeve Reuters dhe AFP, zëdhënësi i Kremlinit, Dmitry Peskov, konfirmoi se forcat ruse janë ende të fokusuara në goditjen e ushtrisë ukrainase dhe infrastrukturës që lidhet me të.
“Forcat e armatosura ruse po kryejnë gjithashtu detyrat e tyre. Siç u tha, ato vazhdojnë të godasin infrastrukturën ushtarake dhe atë që lidhet me të,” tha Peskov.
Ai ka përsëritur vazhdimisht, se Rusia nuk shënjestron qëllimisht civilët, një pretendim që është hedhur poshtë nga autoritetet ukrainase dhe organizatat ndërkombëtare të të drejtave të njeriut pas dëshmive të shumta për viktima në mesin e popullsisë civile.
Peskov shtoi se “sulmet janë të suksesshme, objektivat po shkatërrohen dhe operacioni special ushtarak vazhdon.”
Megjithatë, përkundër intensifikimit të luftimeve, Kremlini theksoi se është ende i përkushtuar ndaj një rruge politike për të arritur qëllimet e tij në konfliktin me Ukrainën.
“Në të njëjtën kohë, Rusia mbetet e interesuar në vazhdimin e procesit të negociatave me qëllim arritjen e qëllimeve tona përmes mjeteve politike dhe diplomatike,” deklaroi Peskov.
Kievi u godit rëndë gjatë natës nga një seri sulmesh ajrore, të cilat autoritetet ukrainase i cilësuan si ndër më të dendurat në javët e fundit.
.
