Forca e Sigurisë së Kosovës është angazhuar në operacionin për menaxhimin e zjarrit të përmasave të mëdha që ka përfshirë deponinë e mbeturinave në fshatin Sverkë, në Komunën e Pejës.
Sipas njoftimit të FSK-së, aktivizimi i njësive është bërë pas një kërkese të Qendrës së Situatave në Sekretariatin e Këshillit të Sigurisë së Kosovës. Fillimisht, Qendra Operative e FSK-së ka kryer një vlerësim të menjëhershëm të situatës dhe kapaciteteve të nevojshme për reagim.
Pas këtij vlerësimi, me urdhër të komandantit të FSK-së, gjenerallejtënant Bashkim Jashari, në zonën e prekur janë dislokuar njësitë e specializuara të Gardës Kombëtare për të mbështetur operacionin.
Sipas FSK-së, ndërhyrja synon izolimin e vatrës së zjarrit, parandalimin e përhapjes së ndotjes toksike dhe minimizimin e rrezikut për shëndetin e qytetarëve dhe mjedisin.
“Operacioni ka nisur me qëllim të izolimit të vatrës së zjarrit, parandalimit të ndotjes toksike të mjedisit dhe shmangies së pasojave të mundshme për shëndetin publik”, thuhet në njoftimin e FSK-së.
Njësitë e FSK-së po veprojnë në koordinim me institucionet qendrore dhe lokale, shërbimet e emergjencave civile dhe banorët e zonës, me synim vënien nën kontroll të situatës sa më shpejt.
“FSK-ja mbetet e përkushtuar t’u shërbejë të gjithë qytetarëve të Republikës së Kosovës, në përputhje me detyrat dhe misionin e saj”, theksohet në njoftim.
