Sekretari i Shtetit amerikan, Marco Rubio, ka sinjalizuar se Kuba mund të jetë objektivi i radhës në kuadër të përpjekjeve të administratës Trump për të rivendosur dominimin amerikan në Hemisferën Perëndimore.
Komentet e Rubios erdhën pas operacionit ushtarak amerikan gjatë natës në Venezuelë, i cili çoi në kapjen e presidentit venezuelian Nicolas Maduro dhe bashkëshortes së tij.
Ai tha se zyrtarët kubanë mund të kenë arsye për t’u ndjerë të pasigurt pas këtyre zhvillimeve.
“Nëse do të jetoja në Havana dhe do të isha në qeveri, do të isha i shqetësuar të paktën pak “, tha Rubio sipas Associated Press.
Shtetet e Bashkuara kanë një histori të gjatë ndërhyrjesh ushtarake në Amerikën Latine, përfshirë mbështetjen e tyre të heshtur për pushtimin e dështuar të Gjirit të Derrave në vitin 1961. Ky operacion, i udhëhequr nga të mërguar kubanë, kishte për qëllim rrëzimin e liderit revolucionar Fidel Castro.
Presidenti kubanez Miguel Diaz-Canel e ka dënuar të shtunën sulmin ndaj Venezuelës si kriminal dhe paralajmëroi se Amerika Latine nuk është “oborri i shtëpisë” ku Shtetet e Bashkuara bëjnë çfarë të duan.
Sipas udhëheqësit kubanez, sulmi nuk ka për qëllim t’i japë fund trafikut të drogës – për të cilin nuk u paraqitën prova që implikojnë Maduron – por përkundrazi të sekuestrojë naftën dhe burimet natyrore të Venezuelës përmes një akti “terrorizmi shtetëror”, të cilin ai e krahasoi me sulmin izraelit ndaj Gazës.
