Pas vendimit për dënimin me burgim të përjetshëm të përgjegjësve për vrasjen e Liridona Ademaj, ka reaguar ministrja e Drejtësisë, Donika Gërvalla, duke theksuar se dhuna ndaj grave dhe femicidi kërkojnë përgjigje të ashpër dhe pa kompromis.
Gërvalla ka deklaruar se asnjë vendim gjyqësor nuk mund ta rikthejë jetën e humbur dhe as të lehtësojë dhimbjen e familjes së viktimës, por ‘drejtësia duhet të jetë e qartë dhe e vendosur përballë krimeve të tilla’.
Ajo ka theksuar se, në rolin e saj si Ministre e Drejtësisë dhe Koordinatore Kombëtare kundër Dhunës, luftimi i dhunës ndaj grave mbetet prioritet i përditshëm institucional.
“Kjo nuk është një çështje që trajtohet vetëm kur ndodhin raste tragjike, por një betejë e vazhdueshme që kërkon angazhim të pandërprerë. Efikasiteti i institucioneve tona matet edhe me vendosmërinë e dënimeve që shqiptohen. Dënimet duhet të jenë në përputhje me peshën e krimit, duke dërguar një mesazh të qartë se dhuna dhe vrasjet nuk tolerohen dhe nuk relativizohen në asnjë rrethanë”, ka shkruar ajo në Facebook.
Ministrja ka nënvizuar se institucionet mbeten të përkushtuara për forcimin e mekanizmave të parandalimit, përmirësimin e reagimit dhe thellimin e koordinimit ndërinstitucional, në mënyrë që asnjë rast dhune të mos mbetet pa trajtim dhe asnjë viktimë pa mbrojtje.
“Shoqëria jonë nuk mund të tolerojë më as heshtjen, as normalizimin e dhunës. Kjo është vijë e kuqe. Dhe kjo vijë duhet të mbrohet me drejtësi, përgjegjësi dhe veprim të pandërprerë”, ka përfunduar Gërvalla.
Ndryshe, Gjykata Themelore në Prishtinë i ka dënuar me burgim të përjetshëm për vrasjen e Liridona Ademajt, Naim Murselin e Granit Plavën.
Kushtrim Kokalla u dënua me 30 vjet burgim. Vendimi është marrë në seancën e mbajtur të martën.
Murseli, bashkëshorti i Ademajt, Plava e Kokalla, të cilët nuk kanë qenë prezent në sallë kur është shpallur vendimi, akuzoheshin për vrasjen e Liridona Ademajt në nëntor të 2023-ës./teve1.info/
