Policia e Kosovës ka dalë me një reagim për protestën që po zhvillohet përreth objekteve të Qeverisë dhe Kuvendit të Kosovës.
Protesta e zhvilluar gjatë ditës pranë objekteve të Qeverisë dhe Kuvendit të Kosovës ka vazhduar edhe gjatë orëve të mbrëmjes.
Sipas Policisë së Kosovës, gjatë protestës një grup pjesëmarrësish ka hedhur vazhdimisht mjete të ndryshme, mjete piroteknike dhe fishekzjarre në drejtim të objekteve shtetërore.
Policia thotë se disa prej protestuesve kanë penguar edhe daljen e deputetëve dhe personave të tjerë nga objekti i Kuvendit.
Policia ka deklaruar se vazhdimisht u ka bërë thirrje protestuesve që të ruajnë qetësinë, të mos dëmtojnë pronën publike dhe të mos pengojnë lëvizjen e lirë.
Megjithatë, sipas Policisë, për shkak të hedhjes së vazhdueshme të mjeteve piroteknike dhe fishekzjarreve, si dhe ndezjes së disa kontejnerëve dhe zjarreve në rrugë, zyrtarët policorë kanë përdorur gaz lotsjellës për ta vënë situatën nën kontroll dhe për të mundësuar lëvizjen e lirë.
Nga këto zhvillime janë shkaktuar dëme materiale, ndërsa Policia ka bërë të ditur se deri më tani nuk raportohet për persona të lënduar rëndë.
Policia ka ritheksuar se e njeh të drejtën e qytetarëve për protestë dhe shprehje të pakënaqësive në mënyrë paqësore, ndërsa ka apeluar për respektimin e ligjit dhe ruajtjen e rendit publik.
Forcat policore do të vazhdojnë të qëndrojnë në terren për të garantuar sigurinë e qytetarëve dhe objekteve shtetërore.
