Ministrja e Drejtësisë, Donika Gërvalla, ka zhvilluar një takim lamtumirës me Shefin e Misionit të EULEX-it në Kosovë, Giovanni Pietro Barbano, ku është diskutuar bashkëpunimi në fushën e sundimit të ligjit dhe proceset reformuese në drejtësi.
Në një postim, Gërvalla ka theksuar rëndësinë e vazhdimit të reformave në sistemin e drejtësisë, duke i cilësuar ato si të domosdoshme dhe të pakthyeshme.
“Reformat në drejtësi mbeten të domosdoshme dhe të pakthyeshme, të orientuara drejt rritjes së llogaridhënies, forcimit të integritetit dhe përmirësimit të efikasitetit në të gjitha hallkat e sistemit”, ka shkruar ajo.
Ajo ka theksuar se në takim është diskutuar edhe funksionalizimi i Byrosë Shtetërore për Verifikimin dhe Konfiskimin e Pasurisë së Pajustifikueshme, të cilën e cilësoi si një nga shtyllat kryesore të reformës në drejtësi.
“Byroja Shtetërore për Verifikimin dhe Konfiskimin e Pasurisë së Pajustifikueshme përbën një ndër shtyllat më të rëndësishme të reformës në drejtësi dhe të luftës kundër korrupsionit e krimit të organizuar, dhe nuk ka rrugë tjetër përveç jetësimit të Byrosë. Byroja do të bëhet. Byroja do të jetësohet. Nuk ka rrugë tjetër”, ka theksuar Gërvalla.
Në takim është diskutuar edhe bashkëpunimi me EULEX-in dhe shkëmbimi i përvojave profesionale në fushën e sundimit të ligjit.
Gërvalla ka shtuar se thellimi i bashkëpunimit me partnerët ndërkombëtarë është i rëndësishëm për rezultate të qëndrueshme në këtë fushë.
“Sundimi i ligjit kërkon zbatim të njëtrajtshëm dhe të paanshëm, si dhe vendimmarrje të qëndrueshme në çdo rast e situatë”, ka shkruar ajo.
