Ylli i Brentfordit Christian Eriksen është grumbulluar me skuadrën e Kombëtares së Danimarkës për herë të parë që prej se pësoi vdekje klinike në fushë gjatë ndeshjes hapëse të Evropianit Euro 2020.
Kombëtarja e Danimarkës do të përballet këtë muaj me Holandën dhe Serbinë në ndeshje miqësore, dhe trajneri Kasper Hjulmand e ka rikthyer Eriksenin në grumbullim.
Eriksen, i cili pësoi sulm në zemër gjatë ndeshjes hapëse të Kampionatit Evropian Euro 2020 kundër Finlandës në stadiumin “Copenhagen Parken”, nuk është paraqitur për kombëtaren e tij që nga ky incident, i cili e detyroi që t’i nënshtrohet një operimi për shpëtim të jetës, ku më pas vetë ylli danez kishte treguar që kishte vdekur në fushë për pesë minuta gjatë këtij rasti në qershorin e vitit të kaluar.
Christian Eriksen ka arritur të regjistrojë 36 gola në 109 paraqitje për Danimarkën, dhe tani dëshira e tij e vetme është që të sigurojë vendin në kombëtaren e tij për Kampionatin Botëror “Katar 2022” që mbahet në fund të këtij viti.
