Pas të shtënave masive vdekjeprurëse në Sydney, kryeministri australian Anthony Albanese deklaroi të hënën se në mbledhjen e kabinetit kombëtar do të diskutohet këtë pasdite mundësia e “ligjeve më të ashpra për armët”.
Nga sulmi me armë zjarri në plazhin Bondi, i ndodhur të dielën, humbën jetën të paktën 16 persona – 15 viktima dhe një nga autorët – ndërsa 42 të tjerë u shtruan në spital.
Autoritetet australiane konfirmuan më herët se dy personat e dyshuar për sulmin ishin baba e bir dhe se hetimet nuk po kërkojnë të dyshuar të tjerë. Babai u vra në vendngjarje, ndërsa djali ndodhet në spital në gjendje kritike, por të stabilizuar.
Qeveria australiane, sipas Albanese, “është e përgatitur të ndërmarrë çdo veprim të nevojshëm. Këtu përfshihet edhe nevoja për ligje më të ashpra për armët”, tha ai gjatë një konference për shtyp.
Axhenda e diskutimeve përfshin masa si kufizimi i numrit të armëve që mund të zotërohen ose licencohen nga individët, si dhe rishikimin periodik të licencave. “Licencat nuk duhet të jenë të përjetshme, dhe kontrollet, sigurisht, duke u siguruar që këto kontrolle dhe balanca janë gjithashtu në vend”, shtoi kryeministri.
Edhe kryeministri i Uellsit të Ri Jugor, Chris Minns, u shpreh se ligjet për armët duhet të ndryshohen për të parandaluar përsëritjen e një tragjedie të tillë.
“Kjo kërkon legjislacion. Do të thotë futja e një projektligji në Parlament, duke e bërë më të vështirë marrjen e këtyre armëve të tmerrshme që nuk kanë përdorim praktik në komunitetin tonë”, tha ai në një konferencë për shtyp, sipas Korporatës Australiane të Transmetimeve.
Sulmi u dënua gjerësisht nga bashkësia ndërkombëtare, duke nxitur thirrje për masa më të forta sigurie dhe kontroll më të rreptë të armëve.
