Gazmen Syla, nënkryetar i Organizatës së Veteranëve të Luftës së UÇK-së (OVL-UÇK), në emisionin “Ditari” në Tëvë1 ka folur për reagimin e organizatës ndaj refuzimit të provave nga Gjykata Speciale për krime lufte.
Syla ka deklaruar se situata aktuale dhe refuzimi i provave nga kjo gjykatë po përdoret për të nxitur protesta të reja.
“Me këtë situatë dhe me këto refuzime, Gjykata Speciale po bën një përpjekje për të mbajtur më shumë protesta,” tha Syla.
Ai njoftoi se po përgatitet një protestë e re, pas asaj të fundit në Tiranë.
“Ne jemi në pritje të organizimit të një proteste tjetër dhe nuk do të ndalemi me protesta,” deklaroi Syla.
Gjithashtu, ai bëri të ditur se protesta tjetër do të mbahet më 2 nëntor në një qendër evropiane, ku do të diskutohet për shumë tema evropiane dhe globale.
“Me 2 nëntor do të jetë protesta tjetër në një qendër evropiane, ku vendosen shumë tema evropiane dhe globale. Do të ndodh kjo protestë,” përfundoi ai.
