Deputeti Haki Abazi pas përjashtimit nga Grupi Parlamentar i VV-së, të enjten ka ndërruar edhe ulësen në Kuvend.
Ai është parë i ulur vetëm, pas ulëseve të deputetëve të Aleancës për Ardhmërinë e Kosovës.
Pranë tij është ulur edhe deputeti Fatmir Humolli, i cili po ashtu ka dalur deputet i pavarur.
Ndryshe, deputeti i pavarur, Haki Abazi, ka komentuar përjashtimin e tij nga Grupi Parlamentar i Lëvizjes Vetëvendosje mbrëmë në Këndin e Debatit në Tëvë 1.
Abazi deklaroi se edhe për vendimin për përjashtim nga Grupi Parlamentar sikurse edhe në atë për shkarkimin e tij nga pozita e kryetarit të Komisionit për Punë të Jashtme, nuk përcaktohet se cila instancë partiake apo institucionale e ka marrë një vendim të tillë.
Por, Abazi tha se nuk është i befasuar sa i përket këtij vendimi sepse siç tha ai, debati demokratik brenda Vetëvendosjes ka devalvuar komplet.