Pas reagimit të Presidentes Vjosa Osmani ndaj mediave, edhe bashkëshorti i saj, Prindon Sadriu, ka lëshuar akuza të ashpra ndaj gazetarëve dhe mediave në Kosovë.
Reagimi i Sadriut vjen pas arrestimit të kameramanit të “Paparacit”, Jetmir Muji, i cili, derisa ishte duke xhiruar për një raport rreth shkollimit të vajzave të Presidentes në një shkollë private, u ndalua nga mbrojtja e afërt e Osmanit, iu konfiskua kamera dhe iu kërkua që të fshinte materialet.
Sadriu, përmes një postimi, i ka quajtur disa gazetarë si nxitës të dhunës dhe përhapës të urrejtjes.
“Fletërrufetë e buzhalistëve, kajtazistëve e mehmetajve nuk janë kritikë, janë cirk i urrejtjes. Postimet e mbushura me shpifje dhe frikë nuk janë lajme e opinione — janë udhëzime dhe nxitje për dhunë edhe ndaj fëmijëve të vegjël.”
Ai ka paralajmëruar për pasojat që sipas tij sjellin sulmet e mediave ndaj individëve.
“Në të kaluarën jo shumë të largët, ato kanë prodhuar pasoja shumë të rënda ndaj viktimave të këtyre fletërrufeve. Koha e dhunës politike, likuidimeve fizike dhe e justifikimit të dhunës që shpien në to ka kaluar. Kushdo që fërkon duart për një skenar të tillë, i bën disfavorin më të madh kauzës tonë për shtet të lirë e demokratik,” ka shkruar ai.
