Bashkimi Evropian ka konfirmuar të hënën se ka rikthyer sanksionet kundër Iranit, pas një veprimi të ngjashëm nga Kombet e Bashkuara.
“Sot, BE-ja riktheu sanksionet kundër Iranit në përgjigje të mosrespektimit të vazhdueshëm të marrëveshjes bërthamore. Dera për negociata diplomatike mbetet e hapur”, ka thënë presidenca e BE-së në një deklaratë.
BE-ja ka shtuar se sanksionet përfshijnë ngrirjen e aseteve të Bankës Qendrore Iraniane dhe bankave të tjera iraniane, si dhe ndalime udhëtimi për disa zyrtarë iranianë, raporton Reuters.
BE-ja gjithashtu po ndalon blerjen dhe transportin e naftës bruto nga Irani dhe shitjen ose furnizimin e arit dhe pajisjeve të caktuara detare.
Të dielën, Kombet e Bashkuara rikthyen një embargo armësh dhe sanksione të tjera ndaj Iranit për shkak të programit të tij bërthamor, pas një procesi të nxitur nga fuqitë evropiane, për të cilin Teherani ka paralajmëruar se do të përballet me një përgjigje të ashpër.
Britania, Franca dhe Gjermania iniciuan kthimin e sanksioneve ndaj Iranit në Këshillin e Sigurimit të OKB-së për shkak të akuzave se kishte shkelur një marrëveshje të vitit 2015 që synonte ta ndalonte atë të zhvillonte bombë bërthamore.
Irani mohon se po zhvillon armë bërthamore.
