Pas marrëveshjes mes Lëvizjes Vetëvendosje (LVV) dhe Lidhjes Demokratike të Kosovës (LDK) për kandidaturën e Bekim Sejdiut për president të Kosovës, deputetja e Partisë Demokratike të Kosovës (PDK), Vlora Çitaku, i ka bërë thirrje kryeministrit në detyrë, Albin Kurti, që të thërrasë menjëherë seancën konstituive të Kuvendit.
Përmes një postimi në Facebook, Çitaku ka kërkuar rikthimin e, siç ka thënë ajo, demokracisë dhe rendit kushtetues në vend.
Sipas saj, mbajtja peng e institucioneve dhe, siç i ka cilësuar ajo, lojërat me shtetin dhe qytetarët nuk përbëjnë demokraci, por abuzim.
“Albin, tash thirre seancën menjëherë dhe konstituoje Kuvendin. Të paktën, riktheje demokracinë dhe rendin kushtetues në vend. Pengmarrja e institucioneve, lojërat me shtetin dhe qytetarët nuk janë demokraci – janë abuzim. Mjaft më me krizë. Demokraci. Tash. Menjëherë”, ka shkruar Çitaku./teve1.info/
