Triumfi në Ligën Unike, ka bërë që Vëllaznimi të tentoj një sukses edhe më të madh këtë sezon, të cilin nuk e ka shijuar asnjëherë në histori të klubit.
Është ky titulli i kampionit të Kosovës në basketboll, trofe që basketbollistët e Vëllaznimit e kanë në mendje prejse fituan Ligën Unike.
Vëllaznimi javën e kaluar u shpall kampion i Ligës Unike për këtë sezon, ndërsa për klubin gjakovar ishte ky trofeu i parë pas gati tri dekadash.
Saktësisht 29 vjet, Vëllaznimi priti për një trofe dhe tani do ta tentoj titullin e kampionit që do të ishte hera e parë, pasi ka të fituar vetëm dy kupa të Kosovës në histori të klubit dhe atë në vitet e 90-ta.
Amerikani Trey Anderson haptazi e pranon se suksesi në Ligën Unike ka shtuar apetitet brenda klubit, duke thënë se tani synimi është titulli i kampionit të Kosovës.
“E di që Liga Unike është një sukses i madh por ne kemi punuar shumë për këtë sukses dhe jam i lumtur e krenar që e kemi arritur së bashku me ekipin. Ne po vazhdojmë të punojmë edhe më shumë tani pas Ligës Unike, pasi synimi është ta fitojmë titullin e kampionit dhe nuk do të dorëzohemi deri në fund. Pra, synimi mbetet titulli pasi për këtë po punojmë dhe flasim çdo ditë me ekipin”.
Për dallim prej Andersonit, amerikani tjetër i Vëllaznimit, Jericole Hellems tregohet paksa më modest në lidhje me titullin e kampionit.
Hellems, i cili është një nga lojtarët kryesor të Vëllaznimit shprehet se gjakovarët synojnë t’i fitojnë të gjitha ndeshjet deri në fund të kampionit. Sipas tij, triumfi në Ligën Unike ishte i pritur.
“Synimi, tani është t’i fitojmë të gjitha ndeshjet dhe t’i shkojmë deri në fund kampionatit. Kam pritur ndoshta ta fitojmë Ligën Unike pasi kemi punuar shumë dhe në fund ia dolëm të gjithë së bashku. Është më rëndësi se suksesi në Ligën Unike na ka motivuar të vazhdojmë me paraqitje të mira”.
Në fakt, suksesi i Vëllaznimit në garën e përbashkët të basketbollit Kosovë – Shqipëri, i atribuohet trajnerit Jeronimo Sarin.
Në fund të tetorit të shkuar, Sarin mori drejtimin e Vëllaznimit duke zëvendësuar Branimir Paviqin dhe nën drejtimin e tij, ekipi nga Gjakova ka treguar paraqitje fantastike.
Për basketbollistin Don Polloshka, triumfi në Ligën Unike nuk ishte i rastësishëm dhe me këtë sukses Vëllaznimi nuk i ka tejkaluar synimet e këtij sezoni .
Optimizmin e ekipit nga Gjakova për të vazhduar me ndeshje të mira deri në fund të kampionatit, e shfaqi edhe lojtari i ri, Ambri Bedra.
Deri në fund të stinorit të rregullt në Superligë kanë mbetur edhe dy xhiro kurse Vëllaznimi synon që në garat e play-offit të futet nga pozita e katërt.
