Një punëtor ka pësuar lëndime të rënda trupore pasi është rrëzuar nga kati i dytë i një objekti në ndërtim në Ferizaj.
Sipas Policisë së Kosovës, rasti ka ndodhur në rrugën “Uran Tinova”, ku viktima 46-vjeçar, dyshohet se ka rënë gjatë kryerjes së punimeve.
Zëdhënësi i Policisë për rajonin e Ferizajt, Kanun Veseli, ka bërë të ditur se i lënduari fillimisht është dërguar për trajtim në Qendrën Emergjente në Ferizaj, por për shkak të gjendjes së rënduar është transferuar në Qendrën Klinike Universitare të Kosovës (QKUK) në Prishtinë.
Nga QKUK-ja për Tëvë1 kanë konfirmuar se pacienti ka arritur në gjendje jo stabile dhe i është nënshtruar menjëherë ekzaminimeve të nevojshme, për t’u dërguar më pas në sallën operative.
“Një person i vitit 1988 është sjell nga Spitali i Ferizajt në gjendje jo të mirë, jo stabile. Janë kryer të gjitha ekzaminimet në qendrën emergjente dhe pastaj është dërguar në sallë, ku tashmë është duke u realizuar operacionin. Pas, daljes nga salla do të trajtohet në mjekimin intensiv. Gjendja e pacientit kur ka ardh ka qenë e rëndë dhe tashmë është duke u trajtuar në sallën operative”, ka deklaruar Vjollca Haklaj, specialiste e mjekësisë emergjente.
Autoritetet po vazhdojnë hetimet për të sqaruar rrethanat e aksidentit në vendin e punës. /teve1.info/
