Pothuajse tre dekada pas masakrës që tronditi Evropën, Behija Rotiç më në fund do të ketë mundësinë të varrosë nënën e saj, Fata Bektiç – viktimë e gjenocidit të Srebrenicës në vitin 1995.
Fata Bektiç ishte 67 vjeç kur u vra nga predhat serbe ndërsa po përpiqej të gjente strehim në bazën e Kombeve të Bashkuara në Potoçari.
Behija, tani 58 vjeç, është e vetmja e mbijetuar nga familja pesëanëtarëshe Bektiç, pasi humbi babain dhe dy motrat pas luftës.
Për gati 30 vjet, ajo nuk kishte asnjë informacion të saktë për fatin e nënës së saj, derisa mbetjet e saj u zbuluan në një varr të cekët në vitin 2021 dhe u identifikuan përmes analizës së ADN-së në fillim të këtij viti, shkruan Anadoly.
E emocionuar, Behija kujton momentet e fundit me nënën: “Gjatë gjithë luftës qëndruam në fshatin tonë. Por kur ra Srebrenica, u nisëm për në Potoçari si të gjithë të tjerët. Ajo nuk mund të ecte, por nuk mund ta linim pas. Aty e vrau predha.”
Në atë kohë, Fata ishte mbi kalë për shkak të sëmundjes. Burri i Behijës, Remzo Rotiç, rrëfen se babai i saj, Meho, ishte detyruar nga forcat serbe që të varroste gruan e tij në një varr të cekët, pranë Potoçarit.
Vite më vonë, familja u përpoq të gjente vendin ku ishte varrosur Fata. Me një përshkrim të Mehos, ata shënuan vendin me një gur të bardhë. Por në vizitat e mëvonshme, varri ishte bosh.
Një moment veçanërisht tronditës për Behijën ishte njohja e këpucëve të nënës së saj gjatë procesit të identifikimit – një detaj që e copëtoi emocionalisht, por i dha fund një pasigurie të gjatë.
Sot, më 11 korrik, në ceremoninë përkujtimore që mbahet çdo vit në Potoçari, do të varrosen mbetjet e shtatë viktimave të reja të identifikuara të gjenocidit. Përveç Fata Bektiç, mes tyre janë edhe dy djem të rinj, Senajid Avdiç dhe Hariz Mujiç, që kishin vetëm 19 vjeç kur u vranë.
Që nga fundi i luftës, 6,765 viktima janë varrosur në Qendrën Përkujtimore të Srebrenicës. Rreth 250 të tjera janë varrosur në varreza lokale sipas dëshirës së familjarëve.
Megjithatë, mbi 1,000 viktima të gjenocidit ende rezultojnë të zhdukur.
Gjenocidi i Srebrenicës, i kryer në korrik të vitit 1995 nga forcat serbe të Bosnjës, nën komandën e Ratko Mlladiç, mbetet krimi më i rëndë në Evropë që nga Lufta e Dytë Botërore.
