Mbrëmja e një prillit të vitit 2025, ishte tronditëse për Kaçanikun.
Polici Muhamet Lika, u vra në hyrje të banesës së tij, gjersa ishte me uniformë zyrtare.
Në gjyqin ndaj gjashtë të akuzuarve, Haki Belës, Rilind Murati, Edmond Lika, Vatan Çaka, Shkëlqim Kuka dhe Diamant Gashi, u dëgjuan katër dëshmitar.
Fqinji i Likës, Egzon Tusha tregoi momentin kur kishte dëgjuar krismat e armës.
“Derisa po i pastroja dhëmbët kom dëgju krisma të armës. Fillimisht i kom dëgju dy krisma. Në atë moment e kom marrë telefonin që me thirrë policinë, e kom thirrë direkt numrin e qendrës në Kacanik, edhe ju shpjegova që i nijta dy krisma të armës në rrugën Idriz Seferi”, deklaroi Egzon Tusha.
Përpos zhurmës së armës, dëshmitari tregoi se ka dëgjuar edhe britmë.
“Kur kanë ndodhë dy krismat e para e kom dëgju edhe një britmë, piskamë e njerit, shumë e madhe, sikur prej dhimtes madhe, s’po di qysh me shpjegu”, kujton Tusha.
Mirëpo, këto dy krisma nuk ishin të vetmet.
“T’u folë me policinë kanë ndodhë edhe dy krisma tjera. M’kujtohet që tu e mshelë derën e banesës me çelës, se thash mos po tenton me hy dikush brenda, edhe ju kom thanë policisë “o hajdi te Luzha”, tha ai.
Informacionin e parë se dicka kishte ndodhur në banesën e shokut të tij, Nehat Lika, e kishte kuptuar përmes rrjeteve sociale.
Me ç’rast ishte nisur menjëherë ne vendngjarje.
“Unë e kam kuptu nga faqja “S’je kaçanikli”, edhe jam nis me shku te banesa e Muhametit, kish pas shumë kallabllak, policë e qytetarë. M’thanë e kanë nis për emergjencë. Fillimisht e kam dit që osht i plagost. Jam nis direkt për emergjencë. Si kom hy në emergjencë e takova Violetën, e pyta cka u bo, më tha që osht plagos Muhameti”, tha Nehat Lika.
Në afërsi të vendit të ngjarjes, pak minuta pas ngjarjes tragjike kishte shkuar Elmedin Raka.
“E pytëm një polic me emrin Agon, se cka ka ndodhë edhe na tregojë që u vra një polic”, pohoi Eledin Rama.
Për vrasjen e policit Muhamet Lika, është duke u zhvilluar edhe një procedurë tjetër, ndaj Rejhan Bela, i cili dyshohet të jetë ekzekutuesi i rreshterit, akt të cilin dyshohet se ka bërë në kohën sa ishte i mitur.
