Pas dështimit të radhës për konstituimin e Kuvendit të Kosovës, shefi i Zyrës së Bashkimit Evropian në Kosovë, Aivo Orav, ka zhvilluar një takim me kryeministrin në detyrë, Albin Kurti, në ambientet e Qeverisë së Kosovës.
Sipas një njoftimi për media nga Zyra e Kryeministrit, në takim është diskutuar për situatën aktuale politike në vend, si dhe për raportet ndërmjet Kosovës dhe Bashkimit Evropian.
“Gjatë takimit, gjithashtu u trajtuan tema që kanë të bëjnë me aktualitetin në vend,” thuhet në njoftimin e Zyrës së Kryeministrit.
Në fokus të bisedës ishte edhe procesi i integrimit evropian. Kryeministri në detyrë, Albin Kurti, theksoi përkushtimin e Qeverisë për të avancuar reformat e nisura gjatë mandatit të tij.
“Kryeministri nënvizoi përkushtimin e Qeverisë për avancimin e reformave të nisura gjatë këtij mandati, duke veçuar rëndësinë e vazhdueshme që i ka kushtuar të drejtave dhe integrimit të plotë të të gjitha komuniteteve pa dallim,” thuhet më tej në komunikatë.
Vizita e Oravit në Qeveri vjen në një moment kritik për vendin, kur përpjekjet për formimin e institucioneve të reja po përballen me ngërç politik dhe presion ndërkombëtar.
