Partizani është një nga skuadrat më të kompletuara në Kategorinë Superiore.
Të paktën në kompeticionet europiane, drejtuesit po bëjnë maksimumin për të ruajtur grupin e plotë të titullarëve, teksa nga ana tjetër po punohet për të forcuar ato pak pika, ku skuadra nevojë për më shumë forcë. Krahët e sulmit kanë qenë një problem i vjetër për Partizanin dhe pritet të jetë pikërisht ky pozicion, ku do të bëhet lëvizja e parë.
“Panorama Sport” ka raportuar prej ditësh se një nga objektivat është Eros Grezda, teksa tashmë bisedimet kanë marrë rrjedhën finale. Sidomos pas firmës me trajnerin Zoran Zekiç, tratativat kanë shkuar shumë mirë dhe palët kanë arritur një akord, që pas prezantimit të Zekiçit, do të formalizohet me firmën mbi kontratë. Grezda në sezonet e fundit nuk ka kaluar periudha shumë të mira për shkak të dëmtimeve dhe Partizanin e sheh si trampolinën, që mund ta kthejë edhe një herë tjetër në arenën e madhe të futbollit.
Ish-sulmuesi i Kombëtares, vjen pas një sezoni të vështirë me 18 zbritje në fushë, 493 minuta në total, ku ka shënuar një gol me hungarezët e Zalaegerzeg. Pjesën e parë e kaloi te turqit e Manisës. Zekiç dhe Grezda njihen shumë mirë me njëri-tjetrin pasi në sezonin 2017-2018 kanë qenë të dy pjesë e Osijekut në Kroaci. Sulmuesi ka shënuar periudhën më të mirë me Zekiçin në stol, pasi në fund të atij sezoni u shit për 2 milionë euro te Rejnxhërsi në Skoci.
Me ardhjen e Grezdës, por edhe të Kekos, që ka firmosur që në muajin janar me Partizanin, sulmi i Partizanit përfshihet nga një mbipopullim dhe pas këtyre firmave, divorcet janë të pashmangshme. Vetëm sulmues qendre janë katër, ndërkohë që gjithsej te Partizani bëhen 7 sulmues.
Te të kuqtë është përfolur shumë edhe ardhja e Sadikut në majë të ofensivës. Më i rrezikuari për t’u larguar është Alfred Mensah, teksa edhe Tedi Cara pritet të meditojë të ardhmen e tij pas Europës. Këto janë dy emrat në dyshim, me ganezin, që është zhgënjimi më i madh në këtë sezon. Ai ka shënuar vetëm 2 gola në 31 paraqitje në fushën e blertë. Partizani pagoi mbi 50 milionë lekë të vjetër për ta liruar nga kontrata me Skënderbeun në verën e shkuar.
