Dështimi i 27 u shënua këtë të enjte.
Edhe këtë herë, pas seancës, nuk u tha asgjë e re.
Kjo pasi partitë politike sërish akuzuan njëra-tjetrën për moskonstituim të Kuvendit.
E para që doli para gazetarëve, ishte Arbëreshë Kryeziu nga Lëvizja Vetëvendosje.
Ajo tha se qëllimi i partive që në legjislaturën e kaluar ishin në opozitë, nuk është formimi i institucioneve të reja, mirëpo vazhdimi i bllokadës dhe krizës politike.
“Fillimisht kanë refuzuar komisionin për verifikimin e mandateve dhe më pastaj duke refuzuar të marrin pjesë në votim për komisionin verifikues për votim të fshehtë të kryeparlamentarit…Është qëndrim i joni që nuk do të votojmë asnjë emër tjetër nga radhët e PDK-së përveç Nait Hasanit dhe Sala Jasharit. Ndërkohë që edhe ne kemi vendosur reciprocitet ndaj LDK-së dhe nuk pranojmë asnjë propozim nga ana e tyre”, u shpreh Arbreshë Kryeziu deputete e VV-së
E nga Partia Demokratike e Kosovës i quajtën kryeneçësi qëndrimet e Vetëvendosjes.
Derisa thanë se propozimi që zgjedhjet e jashtëzakonshme dhe ato lokale të mbahen në të njëjtën kohë, është vetëm politik.
“Edhe sot vazhdoi kryeneçësia e Lëvizjes Vetëvendosje edhe pse i kemi dhënë mundësi dhe bashkëpunim që të konstituojmë Kuvendin me ndonjë prej emrave të tjerë. Fatkeqësisht me gjasë duke mos i pasur numrat për formim të qeverisë kanë vendosur si barrikadë të vendosin një grua që e po delegjitimojnë dhe dëmtojnë reputacionin e tyre. Kjo sjellje e tyre është e papranueshme edhe për votuesit e tyre… Kjo çështja që zgjedhjet e jashtëzakonshme bashkë me ato lokale është për politikë. Nëse duhet me shku në favor të politikës duhet me i bërë bashkë, mirëpo për qytetarë jo”, tha Abelard Tahiri, deputet i PDK-së.
E të njëjtit mendim si Vetëvendosje, nuk janë as nga Lidhja Demokratike e Kosovës.
“…Nuk kemi nevojë që ta përsërisim një proces zgjedhor, sepse nuk mund të priten as edhe ndryshime të mëdha. Në ndërkohë ne e dimë të gjithë procesin tejet të ndërlikuar dhe kohën që e ka marrë për numërim të votave nga ana e KQZ-së. Bashkimi i dy palë zgjedhjeve në një periudhë të caktuara do të shkaktonte probleme të mëdha dhe ka shumë mundësi që zgjedhje të tilla mandej edhe të mos pranohen nga ndonjë subjekt”, tha Hykmete Bajrami.
Tentativa e 28-të për konstituim të Kuvendit do të mbahet të shtunën nga ora 11:00.
