Mospajtimet e dallimet që i patën mes veti i lanë anash.
“Lugina e Bashkuar”, është lista e vetme me të cilën partitë shqiptare do të marrin pjesë në zgjedhjet e 25 tetorit në Serbi.
E gjithë kjo u bë me ndërmjetësimin e kryeministrit Albin Kurtit, i cili edhe njoftoi për arritjen e marrëveshjes për listën e përbashkët “Koalicioni Shqiptar”.
Për të foli edhe në mbledhjen e Qeverisë.
“Një hap i rëndësishëm ky i bashkimit me qëllim arritja e një rezultati që këtë marrëveshje mund ta bëjë historike për shqiptarët e Luginës dhe jo vetëm në përpjekje kundër diskriminimit dhe përjashtimit, sikurse edhe kundër spastrimit etnik administrativ”, ka thënë Kurti.
Pjesë e këtij koalicioni është edhe Lëvizja e Progresit Demokratike.
“Është një hap i rëndësishëm për shqiptarët e Luginës së Preshevës, ku dje arritëm një marrëveshje për gjithë shqiptarët, por në veçanti të shqiptarëve në Luginë të Preshevës, ku të drejtat tona individuale dhe kolektive përfshihen konform Republikës së Kosovës, ku kryeministri i Kosovës arriti që pas asaj në vitin 2020 të kemi një marrëveshje të përbashkët në vitin 2026 që të jemi të gjithë shqiptarët në një listë të përbashkët e kjo të reflektojë edhe në pozicione të tjera dhe të largojmë dallimet tona me subjektet politike. Pas vendimit të fundit të Gjykatës Speciale për krerët tanë, kjo është e rëndësishme që shqiptarët të jenë bashkë”, ka thënë Shqiprim Musliu nga Lëvizja e Progresit Demokratike .
E sa deputetë synon të marrë ky koalicion në Kuvendin e Serbisë?
“Në vitin 2020 kemi pasur tre deputetë, ku opozita nuk ka marrë në atë kohë, këto rrethana, potenciali ynë maksimal është tre, mirëpo me një mobilizim masiv, ku është e involvuar edhe Republika e Kosovës në këtë nxitja e shqiptarëve që jetojnë Kosovës, ku mbi 50% jetojnë në mërgatë, do të arrijmë një numër më të madh. … pritet që të kemi edhe katër dhe pesë deputetë”, tha tutje Shqiprim Musliu nga Lëvizja e Progresit Demokratike.
Përndryshe, tanimë kanë nisur përgatitjet dhe deri më datën 4 tetor do të bëhet edhe dorëzimi i listës me emrat e kandidatëve për deputetë.
Sipas marrëveshjes së publikuar edhe nga kryeministri Albin Kurti, renditja e kandidatëve bëhet sipas peshës politike të subjekteve politike.
