Për katër vitet paraprake, dialogu në mes Kosovës dhe Serbisë ka qenë temë kryesore.
Por këtij procesi, po i shmangen kandidatët për kryeministër të partive politike gjatë fjalimeve nëpër tubime me qytetarë.
Kryeministri aktual i Kosovës në tubime të Vetëvendosjes nuk ka treguar për planin e subjektit të tij në lidhje me dialogun në mes dy vendeve.
Pa zë për këtë çështje në tubime partiake, ka qenë edhe kandidati për kryeministër i Partisë Demokratike të Kosovës, Bedri Hamza.
Televizioni ka dërguar pyetje për planin e PDK-së për këtë pikë dhe adresimet e Hamzës mirëpo për gjithë ditën nuk kanë marrë përgjigje.
Për gati dhjetë ditë fushatë, temës së dialogut iu ka shmangur edhe i pari i Lidhjes Demokratike të Kosovës, Lumir Abdixhiku.
As LDK-ja nuk ka dhënë detaje për planin e tyre në normalizimin e marrëdhënieve në mes Kosovës dhe Serbisë.
E adresim para qytetarëve për këtë gjë nuk ka bërë as kandidati për kryeministër nga radhët e Aleancës për Ardhmërinë e Kosovës, Ramush Haradinaj.
Mirëpo zëdhënësi i AAK-së, Lulzim Blaka e ka përcjell planin duke synuar përmbylljen e kësaj çështje me njohje reciproke.
“Kosova duhet t’i shemb themelet e autonomisë për komunat me shumicë serbe që me veprimet apo mosveprimet e veta, i ka vendosur pushteti i sotëm. Kosova do ta përmbyllë dialogun dhe t’i rikthehet marrëveshjes gjithëpërfshirëse dhe obligative me njohje reciproke. Një marrëveshje përfundimtare me njohje reciproke do të vendoste paqe të përhershme në këtë pjesë të Evropës. Kosova do t’i përmbushë të gjitha obligimet e saj në bashkëpunim me aleatët, posaçërisht SHBA. Aleatët kurrë nuk e kanë tradhtuar Kosovën. Integrimet Euroatlantike ,janë jo vetëm aspiratë e jona, po janë gjithçka për 6 Kosovën dhe rrugë e vetme drejt prosperitetit dhe paqes së përhershme. Anëtarësimi në të gjitha strukturat euroatlantike është jo vetëm e drejtë, por edhe obligim i këtij brezi. Ne duhet t’i kryejmë detyrat e shtëpisë dhe në këtë mandat gjithçka do të jetë e fokusuar në implementimin e obligimeve që ka Kosova ndaj procesit integrues”.
Ish ambasadori i Kosovës, Blerim Canaj thotë se përmendja e dialogut me Serbinë i humb vota partive politike.
Sipas Canajt, këtë kartë nuk do të përdorin.
Emisari i Bashkimit Evropian për dialogun Kosovë – Serbi, Miroslav Lajcak pritet të kryej mandatin në fund të këtij muaji.
Lajcakun pritet ta zëvendësoj emisari danez, Peter Serensen.
