Ish-partitë opozitare kanë konfirmuar se do të marrin pjesë në takimin konsultativ të thirrur nga ushtruesja e detyrës së presidentes, Albulena Haxhiu, për përcaktimin e datës së zgjedhjeve të reja parlamentare.
Subjektet politike që kanë qenë në opozitë, përfshirë PDK-në, LDK-në dhe AAK-në, kanë bërë të ditur se do t’i përgjigjen pozitivisht ftesës së Presidencës e thirrur nga ora 15:00.
Sekretarja e Përgjithshme e PDK-së, Vlora Çitaku, ka konfirmuar pjesëmarrjen duke theksuar se ftesa është pranuar dhe se do të jenë të pranishëm në kohën e caktuar.
Ndërkohë, edhe nga LDK-ja është bërë e ditur se do të marrin pjesë në takim, përmes deputetes Jehona Lushaku-Sadriu.
Po ashtu, pjesëmarrjen e ka konfirmuar edhe Aleanca për Ardhmërinë e Kosovës, e cila do të përfaqësohet në këtë takim nga nënkryetari Ardian Gjini. /teve1.info/
