Sipas Institutit Hidrometeorologjik të Kosovës, një javë e nxehtë po parashikohet të përfshijë Kosovën ditëve në vijim.
Përmes njoftimit bëhet e ditur se kjo situatë vjen si pasojë e masave të nxehta të ajrit të ardhura nga pjesa e Afrikës Veriore.
Këto masa ajrore, të cilat karakterizohen nga temperatura shumë të larta dhe përmbajtje të ulët të lagështisë, thuhet se janë rezultat i qarkullimeve atmosferike që favorizojnë zhvendosjen e ajrit tropikal drejt veriut.
“Ky fenomen meteorologjik shfaqet shpesh gjatë muajve të verës dhe zakonisht shoqërohet me rritje ekstreme të temperaturave, ulje të ndjeshme të reshjeve, si dhe rrezik të shtuar për thatësirë dhe zjarre në zona pyjore dhe fusha bujqësore. Temperaturat mund të tejkalojnë lehtësisht vlerat mesatare sezonale, duke shkaktuar valë të nxehti që ndikojnë negativisht në shëndetin publik”, theksohet në njoftim.
Sipas IMHK-së, indeksi UV do të jetë i lartë, prandaj këshillohet që nga ora 9-17 të kufizohet ekspozimi në rrezet të diellit, veçanërisht personat në moshë, fëmijët dhe personat me sëmundje kronike.
Të hënën do të mbajë mot me diell. Temperaturat minimale do të jenë 13-16 gradë celsius, kurse maksimalet 33-38 gradë celsius.
Të martën parashikohet mot me diell dhe vranësira të shpërndara, ndërsa vende-vende priten riga të shiut me rrufe gjatë ditës. Temperaturat minimale do të jenë 14-17 gradë celsius dhe maksimalet 32-36 gradë celsius.
Të mërkurën moti do të jetë me diell dhe vranësira të shpërndara. Lokalisht parashihen reshje të shkurtra shiu. Temperaturat minimale: 13 – 19°C, ndërkaq temperaturat maksimale: 32-37°C.
Të enjten parashihet të jetë mot me diell dhe vranësira të pakta. Vranësirat gjatë ditës mund të sjellin riga shiu dhe rrufe në disa zona. Temperaturat minimale do të jenë nga 14-19 gradë celsius, kurse maksimalet nga 34-38 gradë celsius.
Të premten do të ketë mot me diell dhe vranësira të shpërndara. Temperaturat minimale do të jenë nga 15 – 20°C, ndërkaq maksimalet 35-39°C.
