Instituti Hidrometeorologjik i Kosovës (IHMK) njofton se të premten vendi do të përfshihet nga mot kryesisht me diell dhe vranësira kalimtare.
Temperaturat minimale do të lëvizin nga 8 deri në 12 gradë Celsius, ndërsa ato maksimale do të arrijnë nga 25 deri në 29 gradë. Era do të fryjë nga veriperëndimi me shpejtësi prej 1 deri në 5 metra në sekondë.
Sipas IHMK-së, kushtet agrometeorologjike gjatë kësaj jave kanë qenë përgjithësisht të favorshme për zhvillimin e kulturave bujqësore. Temperaturat e moderuara dhe freskia gjatë natës kanë krijuar kushte të mira për rritjen e kulturave pranverore, perimeve dhe pemëtarisë. Megjithatë, reshjet e pakta nuk kanë qenë të mjaftueshme për të përmbushur nevojat ujore të bimëve, prandaj fermerëve u rekomandohet të vazhdojnë ujitjen, veçanërisht në kulturat perimore dhe në tokat me kapacitet më të ulët për mbajtjen e lagështisë.
IHMK thekson se në shumë rajone të Kosovës kanë nisur korrje-shirjet e grurit dhe kushtet e motit do të jenë të përshtatshme për zhvillimin e këtyre punimeve, me përjashtim të ndonjë ndërprerjeje të mundshme lokale për shkak të reshjeve të shkurtra.
Sa u përket kushteve biometeorologjike, ato vlerësohen si të favorshme për shumicën e qytetarëve. Temperaturat e këndshme gjatë mëngjesit dhe mbrëmjes, si dhe mungesa e vapës ekstreme, pritet të ndikojnë pozitivisht në mirëqenien e popullsisë, veçanërisht te personat me sëmundje kronike. Gjatë ditës rekomandohet hidratim i rregullt dhe shmangia e ekspozimit të panevojshëm në diell gjatë orëve me rrezatim më të lartë UV.
